legal-info

Sigur fyrir yfirskattanefnd

birkir@legalinfo.is (Birkir Már Árnason) — Tue, 23 Apr 2024 14:35:16 GMT

Úrskurður yfirskattanefndar í máli nr. 55/2024

Með úrskurði yfirskattanefndar í máli nr. 55/2024, dags. 03.04.2024, felldi yfirskattanefnd úrskurð ríkisskattstjóra úr gildi í máli er varðaði skattlagningu bifreiðahlunninda vegna ætlaðra einkanota kæranda af bifreið í eigu einkahlutafélags en kærandi var jafnframt eigandi félagsins.

Fallist var á röksemdir kæranda um að annmarkar á meðferð málsins hjá ríkisskattstjóra væru slíkir að þeir leiddu til þess að ómerkja bæri hinar kærðu breytingar ríkisskattstjóra árin 2019-2022 en byggði kærandi meðal annars á því í málinu að ríkisskattstjóri hafi ekki fylgt andmælaréttar- og rannsóknarreglu stjórnsýslulaga í þaula. Úrskurðurinn er nú aðgengilegur á vefsvæði yfirskattanefndar .

Oddur Valsson, lögmaður á Cicero lögmannsstofu, rak málið fyrir hönd kæranda.

Vinnustofa og námskeið í úttektum á vinnustöðum

Mon, 15 May 2023 17:48:18 GMT

Dagana 10. til 12. maí 2023 var haldin vinnustofa og námskeið í úttektum á vinnustöðum

Líf og Sál stóð fyrir vandaðri og stórglæsilegri þriggja daga vinnustofu og námskeiði sem kennt var af Stale V. Einarsen og Helge Hoel, en báðir tvær eru virtir prófessorar í vinnu- og skipulagssálfræði. Vinnustofan var einstaklega gagnleg, fræðandi og áhugaverð, en aðalumfjöllunarefni vinnustofunnar voru faglegar úttektir eða svokallaðar staðreyndarannsóknir á vinnustöðum þegar upp koma vandamál eða kvartanir vegna eineltis, áreitnis, ofbeldis eða annarra brota eða ótilhlýðilegrar hegðunar eða stjórnunarhátta á vinnustað. Framkvæmdastjóri Cicero sat vinnustofuna og námskeiðið.

Vinnustofan veitti meðal annars innsýn og færni í:

Hvernig lög og reglur liggja til grundvallar fyrir siðferðilega og sanngjarna meðferð eineltis- og áreitnimála eða annarra brota í atvinnulífinu.
Hvernig á að greina atvik og rekja grun um neikvæða hegðun.
Hvernig á að búa til örugga umgjörð til að mæta neikvæðri hegðun á vinnustað.
Hvernig á að taka ákvarðanir sem skýra ábyrgð og þörf á eftirfylgni.
Hver fræðilegur og hagnýtur grunnur á hugtökunum einelti og áreitni er.

Cicero í samstarf við Líf og Sál

Mon, 07 Nov 2022 16:53:20 GMT

Samstarfssamningur hefur verið undirritaður á milli Cicero og Líf og Sál

Í dag (07.11.2022) var undirritaður samstarfssamningur á milli Cicero lögmannsstofu og Líf og Sál ehf. , sálfræði- og ráðgjafastofu, sem er leiðandi á Íslandi í vinnustaðagreiningum og athugunum á einelti, áreitni, ofbeldi og annarri ótilhlýðilegri hegðun á vinnustöðum.

Lögmenn Cicero eru einstaklega stoltir og spenntir fyrir samstarfinu, enda hefur stofan verið að leitast við að skapa sér sérstöðu á íslenskum markaði á sviði starfsmanna- og vinnuréttar.

Sáttmáli gegn einelti, áreitni og ofbeldi á vinnustöðum

Mon, 31 Oct 2022 16:29:20 GMT

Samtök atvinnulífsins gefa út sáttmála gegn einelti, áreitni og ofbeldi á vinnustöðum

Á vef Samtaka atvinnulífsins kemur fram að þau hafi nýverið uppfært sáttmála gegn einelti, áreitni og ofbeldi . Með sáttmálanum vilja þau hvetja starfsfólk og stjórnendur fyrirtækja til að gera gildi hans að hluta af daglegum rekstri. Þar er einnig að finna áhugavert myndband sem fjallar um einelti, áreitni og ofbeldi á vinnustöðum.

Sáttmálann er hægt að prenta út til að gera veggspjöld sem má hengja upp í kaffistofum eða á göngum fyrirtækja til að minna á mikilvægi þess að tryggja vellíðan á vinnustöðum, skapa öryggiskennd og góðan starfsanda. Í sáttmálanum eru dregin fram þau gildi sem geta minnkað hættu á einelti, áreitni eða ofbeldi á vinnustöðum. Með því að hafa þau í heiðri stuðla starfsmenn og stjórnendur að heilbrigðri vinnustaðamenningu.

Frekari upplýsingar um ábyrgð og aðgerðir gegn einelti, áreitni og ofbeldi er að finna á Vinnumarkaðsvef SA .

Bitcoin í brennidepli

Mon, 04 Jan 2021 16:27:04 GMT

Kjartan Ragnars hefur setið fyrir svörum í útvarpinu og sjónvarpinu

Kjartan Ragnars, lögmaður hjá Cicero, hefur setið fyrir svörum í útvarpinu og sjónvarpinu að undanförnu vegna stóraukins áhuga fólks á Bitcoin, en óhætt er að segja að rafmyntin hafi náð nýjum hæðum. Allt frá stofnun Cicero hefur stofan meðal annars sérhæft sig í löfræðiráðgjöf í tengslum við rafmyntir, til dæmis skattalegri meðferð þeirra.

Umrædd viðtöl við Kjartan um viðfangsefnið eru eftirfarandi:

Í útvarpsþættinum Harmageddon 4. janúar 2021 á X-inu 977, sem nálgast má hér .
Í Morgunútvarpinu 11. janúar 2021 á Rás 2, sem nálgast má hér .
Í útvarpsþættinum Harmageddon 12. janúar 2021 á X-inu 977, sem nálgast má hér .
Í útvarpsþættinum Harmageddon 8. febrúar 2021 á X-inu 977, sem nálgast má hér .
Í útvarpsþættinum Reykjavík Síðdegis 8. febrúar 2021 á Bylgjunni, sem nálgast má hér .
Í útvarpsþættinum Harmageddon 16. febrúar 2021 á X-inu 977, sem nálgast má hér .
Í sjónvarpsfréttum 18. febrúar 2021 á Rúv, sem nálgast má hér .
Í hlaðvarpi Rafmyntaráðs Íslands 28. febrúar 2021, sem nálgast má hér .
Í útvarpsþættinum Harmageddon 2. mars 2021 á X-inu 977, sem nálgast má hér .
Í útvarpsþættinum Reykjavík Síðdegis 3. mars 2021 á Bylgjunni, sem nálgast má hér .
Í hlaðvarpinu "Bryndís í stjórnmálum" 4. mars 2021, sem nálgast má hér .

Kalla breyttir tímar á breytta samninga?

birkir@legalinfo.is (Birkir Már Árnason) — Thu, 01 Oct 2020 11:31:20 GMT

Lofsöngur aðlögunar og sveigjanleika í samningagerð

COVID-faraldurinn hefur valdið og mun að öllum líkindum valda talsverðum röskunum í alþjóðaviðskiptum. Ekki er unnt að sjá fyrir allar aðstæður, sama hversu vönduð samningsgerðin er. Enginn les framtíðina þótt menn séu misjafnlega sannspáir.

Í alþjóðlegum samningarétti eru tvö hugtök sem ætlað er að taka á óvæntum eða ófyrirsjáanlegum aðstæðum: force majeure og hardship . Í meginatriðum vísar force majeure til ómöguleika, en hardship til brostinna forsendna. Ómöguleiki varðar þá samninga almennt, en brostnar forsendur einstaka samninga. Annars eru skilin á milli þessara tveggja hugtaka ekki skörp, þrátt fyrir ótal fræðiskrif um þau. Árétta ber að engin ein alþjóðleg regla gildir við þessar aðstæður; hvert ríki beitir sinni eigin löggjöf. Samningsaðilar geta þó samið um að beitt skuli stöðluðum alþjóðlegum reglum.

Alþjóðaverslunarráðið ( International Chamber of Commerce ) lagði fyrst drög að stöðluðum samningsákvæðum um þessi tvö hugtök árið 2003, sem endurskoðuð voru í mars 2020 í kjölfar heimsfaraldursins, þar sem kynntar voru þrjár mismunandi útfærslur af ákvæðunum. [1] Ein útfærslan var gerð einkum með tilliti til aðstæðna lítilla og meðalstórra fyrirtækja, en í meginatriðum felur hún í sér að samningsaðilar verða áfram samningsbundnir þótt það reynist þeim þungbært, erfitt eða jafnvel ómögulegt að efna samninginn. Við þessar aðstæður þurfa samningsaðilar að endursemja vegna þessara tilteknu þátta innan ákveðins tímafrests. Ef samningar nást ekki fyrir þann tíma, vísa aðilar ágreiningi til dóms og leggja hvor fyrir sig fram tillögu að sanngjarnri lausn eða aðlögun fyrri samnings að breyttum aðstæðum.

Aukin áhersla er því lögð á að viðhalda samningssambandinu í stað þess að slíta því með tilheyrandi kostnaði og óþægindum fyrir alla hlutaðeigandi. Sambærilegar breytingar hafa einnig verið gerðar á öðrum evrópskum stöðlum á sviði samningaréttar, sbr. 6.2.1-6.2.3 gr. UPICC ( Unidroit Principles of International Commercial Contracts ) og 6:111 gr. PECL ( Principles of European Contract Law ).

Alvarlegur ágreiningur samningsaðila leiðir oftast til loka viðskipta- og samningssambanda. Á tímum þar sem engin afmælisboð eða önnur vinaleg bréf berast inn um lúguna, heldur einkum innheimtubréf, koma áherslubreytingar sem þessar sem ferskur andblær inn í alþjóðlega samningagerð. Í gömlu máltæki segir að mögur sátt sé oft betri en feitur dómur.

Breytingarnar sem hér eru til skoðunar eru ætlaðar til lengri tíma og eru til þess fallnar að rækta samstarf, samvinnu og samkennd innan samningssambanda. Fyrir slíka nálgun og hegðun á að lofa fyrirtæki. Þetta kann að stuðla að örlítið heilbrigðara viðskiptalífi, sbr. hvatningarorð þjóðskáldsins Matthíasar Jochumssonar í þjóðsöng okkar: „[…] verði gróandi þjóðlíf með þverrandi tár […]“.

Heimsfaraldurinn hefur einangrað okkur félagslega og grætt allt of marga. Það er kominn tími til þess að þerra tárin, græða sárin og endursemja af fullum heilindum, þar sem við á.

[1] Aðgengilegt á heimasíðu ICC: https://iccwbo.org/publication/icc-force-majeure-and-hardship-clauses/

Uppfært: Pistillinn var birtur í Viðskiptablaðinu 3. nóvember 2020 .

Þarf sérstaka löggjöf um Bitcoin?

Mon, 28 Sep 2020 15:49:48 GMT

Þegar stórt er spurt

Líklega er óhætt að fullyrða að flestir Íslendingar sem komnir eru til vits og ára hafi heyrt um rafmyntina Bitcoin. Eflaust myndu þó færri treysta sér til þess að fjölyrða um hvaða lagareglur gilda um viðskipti með rafmyntina frægu. Þessum skrifum er síður en svo ætlað það hlutverk að greina frá þeim reglum með tæmandi hætti, en skemmst er frá því að segja að löggjöfin um rafmyntir er enn í mikilli mótun og verður það líklega næstu árin eða jafnvel áratugina.

Í daglegu tali er oft fjallað um Bitcoin sem gjaldmiðil. Samkvæmt íslenskum lögum er Bitcoin þó ekki gjaldmiðill eða gjaldeyrir í skilningi laga nr. 87/1992 um gjaldeyrismál, né fellur það undir önnur hugtök þeirra laga. Bitcoin fellur heldur ekki undir hugtakið rafeyrir í skilningi laga nr. 17/2013 um meðferð og útgáfu rafeyris. Bitcoin hefur verið skilgreint sem sýndarfé, sbr. 16. tl. 3. gr. laga nr. 140/2018 um aðgerðir gegn peningaþvætti og fjármögnun hryðjaverka.

Að öðru leyti er fáum sem engum reglum til að dreifa sem fjalla sérstaklega um Bitcoin. En áður en af stað er farið með að semja heilu lagabálkana með tilheyrandi reglugerðarfrumskógi er kannski vert að spyrja fyrst eftirfarandi spurningar: Er þörf á því að fjalla sérstaklega um Bitcoin með lögum?

Bitcoin er verðmæti eins og hver önnur verðmæti og nýtur því verndar eignarréttarákvæðis 72. gr. stjórnarskrárinnar. Um Bitcoin gilda því almennar reglur fjármunaréttar, svo sem reglur samninga- og kröfuréttar. Er því endilega fyrir hendi nauðsyn til þess að semja sérstaka löggjöf um þetta nýja fyrirbæri? Eða eru mögulega leikreglur fjármunaréttarins, eins og þær hafa þróast öldum saman, fullnægjandi til þess að takast á við Bitcoin? Kann að vera að okkur fólkinu sé treystandi fyrir því að fást við eigin verðmæti á grundvelli almennra réttarreglna?

Ekki treysti ég mér til þess að svara þessum spurningum í eitt skipti fyrir öll að svo stöddu. Heldur læt ég nægja klassískt, en hundleiðinlegt svar: Þegar stórt er spurt.